12 чэрвеня 2014 г. адбылася прэзентацыя 6 выпуска ў серыі выданняў Навагрудскага гістарычна-краязнаўчага музея "Жывая гісторыя". Асобным выданнем выйшлі ўспаміны Ніны Булаўка, якая нарадзілася ў 1924 г. у в. Купіск на Навагрудчыне.
У 1942 г., калі немцы дазволілі беларусам вучыцца, яна скончыла 6-месячныя настаўніцкія курсы, а затым настаўніцкую семінарыю. Падчас вучобы ў семінарыі, як і многія іншыя навучэнцы, яна ўступіла ў Саюз беларускай моладзі (СБМ). Пасля вайны, у снежні 1944 г. , яе арыштавалі і без аб’яўлення прысуду адправілі спачатку на лесанарыхтоўкі на поўнач Савецкага Саюза, а потым яна яшчэ некалькі гадоў знаходзілася ў ссылцы ў Казахстане. У 1970 г. яе рэабілітавалі.
Успаміны выйшлі на мове арыгінала пад назвай "Ни следствия, ни суда, ни статьи, ни срока…". Прэзентацыя адбылася падчас адкрыцця выставы жывапісу Віктара Залалаціліна, яе сына, у раённай бібліятэцы.
У Навагрудскім гісторыка-краязныўчым музее працягваецца праект "Крытычны разгляд гісторыі праз дыялог пакаленняў. Раскажы мне свае жыццё". Праект ажыццяўляецца пры падтрымцы германскага фонду "Памяць. Адказнасць. Будучыня" праз МОО "Узаемаразуменне". Цэлевой групай з'яўляюцца остарбайтары – людзі якіх прымусова вывозілі на працу падчас акупацыі 1941-44 гг.